NGGOLET IWAK

Salam paseduluran,

Jaman mbiyen sing jenenge mangan iwak tumrape wong ndesa kuwe tergolong mewah. Mulane wong ndesa klebu wong ndesaku kuwe paling seneng angger kon nggolet iwak. Akeh cara lan werna nggo nggolet iwak, antarane:


1. Mancing


Panggonan sing akeh iwake nggo mancing antarane: sawah, kali, kedung, ceblung. Alat sing nggo mancing biasane digawe sekang pring, jenenge walesan. Utawane nganggo kayu wit salak. Senar karo patise dijiret nang pucuk walesan. Ning aja pisan-pisan nganggo walesan sing digawe sekang pring wulung, mergane biasane nggone mancing ulihan, ning ulieh ula banyu. Ning ana kepercayaan nek nganggo walesan sekang pring tali sing bekas nggo nggawa wong mati biasane ulihan. Tapi enyong dhewek urung tau mbuktekna wong wedi mbok mrimpeni. Ning sing jenenge mancing pancen untung-untungan. Sing penting kesabaran karo atine kudu tenang ben iwake gelem mangan umpane. Empan sing nggo mancing biasane nganggo cacing, laron, kinjeng utawane precil. Iwak sing paling umum jenise bethik, bayong, kathing, ceba. Nek lagi mandan apes ya ulieh wader. Sing paling nikmat angger lagi mancing pas empane dipangan terus disendhal rasane grendel kena kiye iwake. Ana uga sing seneng mancing panjeran. Dadi nggone gawe pancing sing akeh misale nganti sepuluh utawane rong puluh, dipasang bareng nang sawah nek sore, esuk-esuke disendhali tuk siji-siji. Untung-untungan bisa ulih sethithik bisa ulih akeh.


2. Urek-Urek


Istilah kiye dienggo khusus nek nggolet welut. Umume nggolet welut ya meng sawah utawa kalen pinggir sawah. Alate nganggo senar karo patis, senare diulir kaya tambang sing mandan dawa. Umpane ngaggo precil ijo utawa cacing. Angger kepingin cepet dipangan biasane empane dioser-oseri bawang putih. Nggolet leng welut ya gampang-gampang angel. Biasane lenge lewih mblondho/gilig. Aja pisan-pisan urek-urek nang leng sing lonjong, biasane nek udu leng yuyu ya leng ula. Angger empane wis ditarik nang welut, aja kesusu, dinengna bae dhisit ben ditarik mandan jero, nganti ora ditarik maning utawa meneng dhewek. Nek wis meneng biasane welute kuwe lagi ngeleg empane. Nek kira-kira empane wis dieleg nang welute nembe senare ditarik alon-alon. Angger welute cilik ya gampang narike, ning angger gapur ya abot, malah bisa-bisa pathise pedhot. Nek wis ketarik nang njaba kudu cepet dibantingna meng galengan ben ora ucul maning. Seliyane urek-urek ana cara liyane nggo nggolet welut sing jenenge ngalang. Carane pinggire leng welut dikeruki nganti pandhes belete. Lha nek wis pandhes lan bersih mengko gari diencot-encot sekitare leng welut. Biasane welute terus metu, lha kiye tantangan sing paling angel, bisa apa ora ndikep welute. Enyong dhewek nek ulih welut biasane paling seneng nek ora disambel ya dipepes karo mbuluk. Jan enak banget, maknyus pokoke.


3. Ngobor


Ngobor iwak utawa welut, bisa nang sawah utawa nang kali. Alate nganggo petromak utawane sempor nggo ngobori, gethikan utawane parang/pedhang kodhol, karo kepis nggo wadah iwak/welute. Welut gelem metu akeh biasane nek tes ana grimis ning sing ora gawe buthek banyu sawah. Ngobor butuh akeh tenaga. Biasane bar ngobor terus kencoten. Sing jelas angger bar ngobor kuwe biasane irunge dadi ireng kena langese sempor. Wong desaku angger ngobor biasane nganti tekan wates kaliabang.


4. Tawu/Gobyag


Tawu biasane nang kalen. Sekang kalen sisih ngisor dibendung dhisit terus ditawu. Nek seenggon wis rampung, wis diakali kabeh iwake, ndhuwure dibendung maning. Terus bendungan sing tengah dibedah ben banyune mandan sat. Nek tesih mandan jero ya ditawu maning, nganti sat ben gampang nggone ngaraih iwake.
Nek sing jenenge gobyag kuwe tawu nang sawah. Angger bar panen rendheng biasane iwake akeh. Jaman mbiyen pari sing ditandur biasane pari jawa utawa pari gedhe sing wite dhuwur-dhuwur kaya wit pari ketan. Nek jaman siki sing ditandur biasane pari Cisadane, IR utawa liyane sing wit parine pendhek-pendhek, umur tanam nganti panane ya lewih pendek, dadi panene lewih cepet. Sawah sing wis dipanen karo ani-ani terus dibendung sing mandan amba. Biasane sing jenenge gobyag wong se-RT padha melu kabeh ya wong tuwa, lanang wedon uga bocah cilik-cilik. Bagian sing wis dibendung terus ditawu bareng tuk sethithik. Mengko nek mandan sat terus damene diidek-idek kaya wong gawe leleran. Nek nggone ngidek-ngidek wis rata kaya leleran, terus iwake mulai padha metu. Lha kuwe mulai rame nggone padha rebutan ndikep iwake. Nek iwake gedhe biasane metune klobrok-klobrok terus padha dadi rebutan nganti gupak belet. Pokoke rame, nyenengna banget. Tapi siki kayane wis ora ana sing jenenge gobyag.

5. Pasang Wuwu

Masang wuwu nang tulakan galengan sawah. Nggone masang sore-sore, saben esuke maning ditiliki. Biasane nek lagi akeh iwak bisa ulih bayong utawa bethik.

6. Nyamber

Biasane nang kali sing ngedung utawa jero. Contone Kali Bandha. Enyong dhewek mbiyen angger ngancani nyamber pamane nganti tekan kidul pekuwon. Dadi kelingan nang kedung pekuwon enyong tau ketilem gara-gara mlebu kedhung sing jero, sementara tangane nyekel iwak ceba, ora disot-na. Kasil Iwak sing paling umum ya iwak ceba karo bayong.

7. Nyetrum

Nyetrum biasene nang kali. Biasane kasil iwake lewih akeh. Nek nganggo setrum iwak sing cilik-cilik kaya wader, urang ya padha kena kabeh. Nek iwake wis padha kleyengan mung gari nyeseri. Cara kiye sing paling akeh dikepengini wong. Ning jere nyetrum ana bahayane, salah-salah bisa nyetrum sikile dhewek.

8. Nganco

Daerah kidul sing biasane angger banjir suwe sat-te. Lha nek banyune ora sat-sat wong-wong padha nganco. Angger bar musim banjir biasane enyong sering pit-pitan liwat pasar Karanganyar ngidul nganti tekan kemujan, ngidul maning tekan sugih waras. Daerah kidul kiye angger musim banjir ya musim iwak.

9. Njala

Ora kabeh wong bisa, tur pancen langka wong sing duwe jala. Ning biasane ulieh iwak mung sing cilik-cilik, kaya wader, urang lan sebangsane.

10. Motas

Cara sing paling gampang mung gari ngramu obat terus disiramna nang banyu kali utawa kalen. Ora let suwe iwake padha mendem kabeh terus gari padha rebutan nggone nyeseri. Ning cara kiye paling ngrusak lingkungan, ora mung iwak sing padha mati, enthog utawane bebek sing padha melu mangan iwake bisane padha lumpuh terus mati. Pokoke cara kiye ora recommended lah....

Nek dieling-eling jaman mbiyen nganti siki, ana bae iwak sing populasine akeh terus kayata iwak sisi melik, wader, kathing, bethik, bayong. Nek iwak sing wis langka utawane meh punah kayata
boso (sing ngumpet nang wedhi, kulite kasar, meh kaya sapu-sapu nek nang Jakarta, jere wong tuwa nek kakehen mangan iwak kiye raine bisa burasen/kasar), bogo, gabel(kaya kathing tapi gedhe meh kaya iwak patin nek cara Jakartane), Sili(sing gelem mbrambang, jere nek kebrambang sili rasane pedhes banget, nind enyong tau mlaku-mlaku nang Jatinegara ternyata ana iwak sili sing didol).

Kaya kuwe kurang lewieh crita nggolet iwak. Nyenengna, ning kadang ya mangkel nek ulieh mung sethithik utawa ora ulih babar blas, sing ana mung kesele thok. Ning siki enyong nembe ngerti ternyata ana cara sing paling gampang nggo nggolet iwak, kepengin ngerti ora carane?
Carane ya Nggawa dhuwit sing akeh meng pasar iwak, takon regane iwak terus dituku iwake, semakin akeh dhuwite semakin akeh iwak sing bisa digawa bali.

Matur nuwun,
Ramane Hatta (Suwarto Kartadiraja)
Karangkemiri Kulon, Lor kali Karanganyar

Crita Mudik Badan 2008

Salam paseduluran,

Badan wingi inyong sekeluarga mudik meng Jawa. Gandeng bojoku wong Ngawi Jawa Timur, dadi mudike ngetan dhisit. Ngetan tanggal 26 September dina Jemuah mbengi, ora ngertia lagi macet-macete. Tapi wong anu wis diniati, dadine semacet-macete ya tetep disyukuri lan dinikmati. Singkat crita dina minggu esuk inyong sekeluarga nembe tekan Ngawi, wong sempet nginep nang Boyolali agi setu mbengi. Inyong sekeluarga nang Ngawi nganti lebaran dina pertama tanggal 1 Oktober 2008.

Sabubare acara halal bihalal keluarga karo tangga teparo nang Ngawi Jam setengah rolas awan tanggal 1 Oktober 2008, inyong sekeluarga pamitan bali meng Karanganyar Kebumen. Meng Karanganayar rencane nunggang Sepur sekang Walikukun Ngawi. Sepur meng Karanganyar sing bisa ditumpaki ana loro Pasundan(Surabaya-Kiara Condong) karo Logawa (Jember - Purwokerto). Ning ora ngertia sepur Pasundan nembe bae liwat kira-kira limolas menit kepungkur. Sidane nunggu sepur Logawa sing jarene mangkat ngulon jam loro. Ditunggu-tunggu nganti suwe ora teka-teka. Ora let suwe ana pengumuman nek Sepur Logawa telat, diperkirakan tekane kira-kira jam setengah lima. Bot-bote arep sungkem karo wong tuwa ya sidane ditunggu kanthi sabar, anakku Hatta sing ketone klesedan bae nakokna sepure ko ora teka-teka. Sawise ditunggu nganti jam setengah lima ternyata bener, sepure nembe teka, Alhamdulillah ora patia sesek, longgar. Dibanding pengalaman taun 2007 mangkat ngulon dina ke loro lebaran meh bae ora bisa munggah, saking seseke, bisaa munggah ya mung ngadeg nang dalan edek sambungan gerbong, karo nang WC sing mambune ora nguati. Sepur Logawa mlebu Karanganyar kira-kira jam sepuluh wengi. Inyong sekeluarga terus nunggang becak maksude arep meng pasar mangan dhisit liwat alaun-alun Karanganyar. Ora ngertia nang alun-alun ngarep DPU tesih ana tukang sate, sidane mandeg dhisit nang alun-alun mangan sate. Ternyata siki wis apik ya alun-alune, wis dibangun trotoar seubengan alun-alun. Mangan sate karo nyawang BTS-BTS Telkomsel-Telkom Flexi-Indosat sing ngeblok nang sisih lor kulon alun-alun Karanganyar. Inyong karo nyritakena nek omaeh mbah nang ngisor BTS kuwe dadine sedhela maning tekan omaeh mbaeh. Inyong uga nyritakena nek sekolah SMPN-ne mbiyen nang SMP 1 Karanganyar karo nunjuk arah SMP 1 sing keton lampune thok. Sawise mangan sate nerusna mbecak, tekan ngomah jam 11 wengi. Sawise resik-resik seperlune lan sholat jamak terus bleg sek turu saking kesele.


Dina ke loro lebaran sawise sungkem karo wong tuwa terus halal bihalal dhisit karo tangga teparo nang Karangkemiri Karanganyar. Sorene kira-kira jam papat sore inyong sekeluarga numpak motor, plesiran meng Petanahan. Dalan meng Petanahan wis mulus banget, dadine setengah jam thok mlaku santai wis bisa tekan pantai. Saiki wis ana kemajuane wis dibangun dadi lewih rapih, parkire siki wis edek banget karo laute. Ora kaya mbiyen jaman cilikanku angger meng Petanahan nunggange truk gedhe mudhun pasar petanahan, ngidule maning nek ora mlaku ya ngojek tesih adoh banget rasane, wong angger mlaku nganti thiyel sikile. Nang Petanahan siki uga wis ana becak sing dipasangi mesin, dadi tukang becake ora perlu ngothel pedal tapi mung gari mainin gas kaya wong numpak motor. Nambah kreatif ya... Mlebune Petanahan mbayar 2500 per wong. Nang Petanahan anakku sempet nunggang jaran putih mbolak mblaik ngetan ngulon kira-kira satus meteran,mbayare limang ewu.

Nunggang Jaran nang Petanahan
Bar Maghrib terus mangan soto nang pinggir laut. Bar mangan terus bali. Kelingan nek nang alun-alun Karanganyar ana sing dodolan gembus, dadine mampir dhisit meng alun-alun. Tuku gembus rong iket sepuluh ewu, sing seiket dipangan nang kono, sing seiket digawa balik. Gembus sing nembe dientas sekang wajan, rasane nylekamin banget luuh, dhasare anu wis suwe ora tau mangan. Anakku ya doyan banget sing jenenge gembus, nganti kakine gumun bocah kota koh doyan budin....

Dina ke telu badan wingi, enyong sekeluarga ya plesiran meng Goa Jatijajar. Mlebune ya mbayar 2500 per kepala. Enyong meng Jatijajar terakhir agi tahun 94 pas lulus SMA. Wektu semana kebenaran kanca sekelasku nang SMAN Gombong ana sing umaeh persis nang ngarep Goa Jatijajar, dadi mlebune mbiyen ya gratis, wong anu kancaku kenal banget karo penjagane sih, tur ya bocah sekolah dadi dimelasi. Bareng nang mulut goa, enyong ketemu kanca SMP, bocah Candi Serang jenenge Soedarso sing siki dadi dosen nang ITS, Sukolilo Surabaya. Sawise ngobrol secukupe, enyong sekeluarga terus mlebu menyusuri lorong-lorang goa. Padhet banget pancen, mlakune bae ngantri tuk siji-siji. Durung suwe inyong mlebu gua, ketemu kancaku maning Soedarso, dheweke wedi ora wani mlebu, khawatir mbok padha jorog-jorogan kaya kasus zakat Pasuruan. Nyatane wonge uyel-uyelan banget sih.




Sesek-sesekan nang Jatijajar
Ning untunge siki wis ana lampune dadi ora peteng ndhedhet kaya jaman mbiyen. Sajroning goa Jatijajar akeh patung-patunge, ana patung Kamandaka, patung lutung kasarung, patung macan. Seliyane patung uga ana sendang yakuwe sendang mawar karo sendang kanthil. Miturut penjagane banyu sendang kuwe bisa gawe awet nom. Biyung bocah sempet raup nang sendhang Mawar, nyong karo Hatta raup nang sendang kanthil. Sing ora nguati ya antriane akeh banget, sanajan mung arep raup karo wisuh thok. Sawise ngliwati sendhang kanthil ora let suwe tekan meng pintu keluar goa. Metu kan goa tuku jus nangka sabrang (sirsak) seger banget rasane. Terus jajan lotek (pecel) sing nganggo kecombrang, kembang turi, karo godhong cakra-cikri, enake ngepoll. Bar mangan terus mlaku metu karo nggolet souvenir. Tuku kaligrafi ayat kursi sing digawe sekang kulit telungpuluhlima ewu, ulih loro. Bar kuwe terus sholat jamak. Bar sholat terus mlaku maning meng arah Pantai Logending.


Kira-kira jam telu sore inyong seanak bojone, mlaku maning meng arah Pantai Logending. Sekang Jatijajar, Logending kuwe araeh ngulon ngidul. Kurang lewih setengah jam wis tekan bates Pantai. Mung salahku inyong belok arah kanan. Ora ngertia bareng dipedheki pantai kuwe jenenge pantai Jetis, mlebu wilayah Cilacap. Wis kadung meng pantai tur mbayar mlebune, senajan mung limang ewu wong loro, ya sidane diterusna bae. Kan pantai Jetis ngetan nekani keramaian, ora ngertia kon mbayar maning limang ewu maning wong loro, jare jenenge panti Congot. Bareng nang kono enyong nembe ngerti sing jenenge pantai Logending kuwe nang sebrange pantai Congot. Suasana pantai enak, akeh pengunjunge, nek ndeleng arah ngalor jejer pegunungan, wit mangroove ijo royo-royo subur banget nambah ngademi pandangan mata.
Mangroove Logendhing
Nang kana ya bisa numpak prau mubeng-mubeng limolas menitan mbayar sepuluh ewu.

Numpak prau Logendhing
Sing padha mancing nang pinggir pantai ya akeh. Sawise cukup puas dolanan nang sebrange pantai Logendhing, inyong niat arep tuku iwak laut. Ora ngertia iwake ora ana sing gedhe, dadine ora sida tuku iwak. Kira-kira jam setengah lima inyong balik, metune ya liwat Pantai Jetis. Tiwas wis mbayar tapi durung menikmati ombak pantai Jetis, inyong njajal meng pinggir pantai Jetis. Ternyata motor bisa digawa nganti jarak lima meter meng bibir pantai. Dhasare ombake cilik tur pasire mandan padhet dadi bisa diliwati motor beda banget karo Petanahan. Numpak motor nang pinggir pantai ngetan ngulon rasane enak angger lagi ngulon, ning angger lagi ngetan angine gedhe banget. Kira-kira jam lima sore inyong bali meng Karanganyar.

Wong anu wis tau krungu nek ana jalur anyar Cilacap -Yogyakarta liwat jalur selatan, dadine inyong njajal dalan kuwe. Pas arep balik nembe ngliwati Pantai Logendhing sing sebenere. Wis ana tandha sing diliwati, nek Karangbolong jarake tesih 17 km maning seka Pantai Logendhing. Inyong nyante bae nggone numpak motor. Ora let suwe kira-kira 1 km perjalanan, ora ngertia dalane mulai munggah mudhun, belak-belok ora karu-karuan. Inyong ya kur mbatin muga-muga dalan sing kaya kiye ora dawa. Bareng suwe-suwe koh dalane kaya kuwe kabeh sepanjang pejalanan Logendhing - Karangbolong. Munggah mudhun, menggok kanan - menggok kiri. Sing dadi masalah inyong mbonceng-na anak bojo, anakku turu maning, dadi angger agi mudhun kuwe rasane abot banget kesurung anak bojoku. Kewatirku angger lagi mudhun mbok nganti keplantrangen koh. Nek nganti keplantrangan, ngisore jurang kan mbuh kepriwe nasibe.... Tapi sing jelas inyong karo bojoku ya terus karo ndonga ben slamet ora ana alangan apa-apa. Jeneng-jeneng desa sing diliwati kayane inyong ya ora tau krungu, ana Argopeni ana apa maning ya. Ujarku numpak motor wis suwe koh ya ora tekan-tekan Karangbolong. Ning bareng ana tulisan desa pasir, inyong wis mandan tenang, sebabe aku tau krungu nek pasir kuwe sekulone Karangbolong. Bener bae ora let suwe terus tekan pertelon Karangbolong. Wis njukut dalan ngalor tenang dalane lempah maning. Karangbolong ngalor Buayan, buayan ngalor Kewarasan, Kewarasan ngalor Gombong. Nek wis tekan Gombong tenang, kaya wis tekan nang ngumaeh dhewek. Tekan ngomah Karanganyar jam setengah pitu wengi.


Dina ke papat lebaran, inyong sekeluarga plesiran maning. Wingi bar keselen sekang Jatijajar karo Logendhing dadine dina ke papat plesirane ya sorean bae. Tujuane ora adoh yakuwe waduk Sempor. Sekang ngomah jam 3 seprapat, mampir mesjid Karanganyar sholat ashar dhisit. Bar sholat terus mlaku maning. Dalan ngulon mulaih rame, malah puncak arus balik nek ora salah. Dadine Karanganyar Gombong sing biasane 10 menit tekan kiye nganti setengah jam. Tekan Gombong bangjo mbelok ngalor. Terus dalane lancar banget, mung cuacane mendung tebal mulaih grimis. Tekan waduk sempor kira kira jam papat seprapat. Nang kana terus foto-foto ndeleng keindahan waduk. Ketone siki wis mandan cethek.

Sempor disaput mendung
Mangsa ketiga wit-witan padha garing dadi pemandangane biasa bae. Sawise puas dolanan nang Sempor terus bali ngidul maning liwat Gombong. Sempet mampir nang nggone Sate Kambing Laminah kulon bangjo Gombong.

Sate Kambing Laminah Gombong
Lumayan enak juga ternyata..... Bar maghrig bali Karanganyar, ora ngertia nang dalan kudanan, nganti mandhek pindho. Mandek ping pisan nang Alfamart Wero (pertelon Patemon), mandek ping pindho nang Kedung Puji.



Dina kelima lebaran persiapan nggo mbalik ngulon Bekasi. Inyong wis mesen tiket Sumber Alam ket awal puasa. Tiket Sumber Alam AC Toilet jurusan Pulogadung regane 220ewu. Kon ngumpul jam 4 sore. Ditunggu-tunggu nganti maghrib durung teka juga bise. Bar maghrib diumumna nek bis kan kulon durung ana sing mlebu meng pool Kutoarjo, yakuwe ternyata gara-gara puncak arus balik sing terjadi malem minggu nyebabna bise padha telat ngetane. Nggone ngumumna agen sumber alam karo ngomong njaluk ngapura, dheweke ngomong ngerteni perasaane penumpang, apa maning sing nggawa bocah cilik, inilah mahalnya silaturahmi, bot-botte arep sungkem wong tuwa, rekasane kaya ngapa bae ya tetep dilakoni. Beruntunglah sing tesih duwe wong tuwa Alhamdulillah kudu disyukuri. Omongan-omongan kuwe ya mandan ngadem nentremi wong sing ngrungokna. Ditunggu-tunggu maning nganti mbengi, jam setengah sepuluh mbengi bise nembe teka. Sawise padha munggah terus mangkat ngulon, dalan ngulon tesih penuh mobil. Tekan Purbowangi macet-cet ora obah kira sejam. anu wis kesel sidane inyong keturon tangi-tangi wis nang daerah Pekuncen kira-kira jam loro mbengi. Dalan tesih macet kira-kira jam 6 nembe tekan Brebes. Jalur pantura padat merayap, sepisan-pisan macet. Tekan Subang kira-kira jam 9 awan, bise mampir meng rumah makan. Mlaku maning karo macet-macetan tekan Pulogadung jam loro awan. Nang terminal Pulogadung mampir mangan nang Warung Padang. Bar mangan numpak taksi meng Bekasi, tekan ngomah jam 3 sore. Terus ngaso. Nembe kiye krasa kesele.........


Reported by:
Ramane Hatta
Suwarto
Karangkemiri - Karanganyar

Laporan Pandangan Mata Kopdar Buka Puasa Bersama Yokobento

Woro-woro kopdar buka puasa bersama Yokobento wis diumumna nang milis kurang lewih sepuluh dina nganti rong minggu sedurunge tanggal 20. Anggota sing wis ngisi database lan ana nomer telepon HP-ne mestine ya ulih SMS sekang ki lurah ngenani undangan buka puasa bersama kuwe. Bar ulih SMS undangan buka puasa bersama aku terus niat kepingin nekani acarane kuwe. Nang milis terus diumumna sapa sing arep melu ya terus dikon konfirmasi. Nek ora salah sing konfirmasi arep teka kurang lewih 40 member. Telung ndina sedurunge tanggal 20, meh bae ana alangan, sekolahane anakku (Hatta, nembe TK-A) uga nganakena Buka Puasa Bersama. Meh bae aku ora bisa melu kopdar maning, tapi sawise rembugan karo biyung bocah sidane bisa dikompromi, aku buka puasa nang Yokobento, anak bojoku nang sekolahan TK Prima Sakinah. Masalaeh anu wis kebelet banget melu kopdar, masa kudu gagal maning-gagal maning. Ingatase dadi member kawit tahun 2003 – 2008 durung tau babar blas melu kopdar. Padahal selawase kuwe ya sering ana kopdar kaya sing nang depok, nang Manggarai, nang UI, nang Kemayoran, nang Legoso. Taun 2003 lagi dadi member anyar aku nganggo id narayani_001 nganti 2005 bareng duwe anak ganti dadi ramane_hatta, wong anu anakku jenenge Hatta Anggayuh Lintang.

Dina setu 20 September 2008, ket esuk aku wis siap-siap nang ngomah ngumbah pit motor dhisit, anu wis mandan kotor tur ya wis suwe ora dikumbah. Jam rolas awan ba’da dzuhur aku ngeloni anakku dhisit ben turu, masalaeh nek ngerti ramane lunga mesti bakal ribut arep melu, padahal dheweke ya ana acara dhewek nang sekolahan. Jam siji awan aku adus, terus jam setengah loro magkat meng daleme pak Kaji Nur. Anu dhasare daerah umaeh pak kaji Nur (Perumnas 3) wis sering tek jelajahi sih dadi ya aku wis apal dalan-dalane, mulane aku nunggang hondane (padahal mereke Suzuki) ya alon alon bae, nyante. Sawise menempuh perjalanan kurang lewih 17-an kilo, jam 2 seprapat aku tekan umaeh Pak Nur. Sawise markir honda aku mlebu lewat restorane, takon karo pegawene pak Nur acarane dianakena nang ngendi. Terus aku ditidokena nek acarane nang loteng, lantai loro. Pas aku teka nang kono wis mandan rame, ana ki Lurah Marsikin, Eko Hadiyanto, Maino Dwi Hartono, shohibul bayt Kaji Nur, Arief, mbak Mirah, lan Mbak Muji. Senajan nembe pisan ketemu ngobrole ya nyambung bae, wong padha-padha ngapake sih. Ora let suwe kang Umbul Karanggayam teka karo kancane. Ngobrol ngalor-ngidul karo kang Umbul, jebulane sedulur-dulure sekolaeh bareng karo aku nang SMAN Gombong. Dulure ya ana sing dadi tanggaku nang ndesa. Se-ngertiku member sekang karanggayam kuwe sing paling aktif nek ana kopdar nang ngendi-ngendi. Jajal bae dititeni nek saben ana kopdar mesti salah siji kang Umbul, sugih-sugihe utawane kang Haris mesti ana sing melu. Meh jam 3 terus ana sing teka maning yaiku kang sugi karo masteng Antarini. Kang Sugi kuwe sanajan wong Purworejo ning bisa melu ngramekna kopdar milis Karanganyar Kebumen. Carike, kang Haris sing ditunggu-tunggu malah ora teka-teka, bareng dibel nang kang Umbul, jare posisine esih nang Pancoran, padahal wektune wis tambah sore. Terus ana sing teka maning Kang Puji Rahmat (Abu Athifah), terus disusul kang Pebri karo mbak Eka. Ora let suwe maning teka kang Amir karo anak bojone. Kang Amir sing jeneng kerenne mbiyen kang Plenthis, Mira terus terakhir Amsens termasuk member awal milis Karanganayar Kebumen. Jaman kuwe aku tesih kelingan sing paling aktif nang milis seliyane Pak Marsikin, Pak Mardiyo, Kang Paino Widodo uga kang Plenthis kiye. Sing paling khas nek ana member anyar ya terus kon kenalan terus salaman dimin ceg orag-orag. Ning bareng ketemu koh kayane mandan beda 150 persen, wonge ternyata kalem banget, bedha angger nang milis kuwe paling rame. Menjelang jam 4 sing wis padha teka terus foto-foto bareng , jeprat-jepret nganti marem berfoto ria. Kira-kira jam 4 sore kang Sugih-sugihe teka karo humas Iwakk Walet Emas pak Bambang Surisno. Nyambi nunggoni kanca-kanca liyane sing padha durung teka, ana sing tetep dopokan ana sing nonton DVD-ne Ungu dilanjut kelenengan banyumasan lan peang penjol, ana uga sing tesih foto-foto. Ora let suwe teka ustad Rozikin karo bojone, sing jere duwe club dhewek sing jenenge Lawet Kencana. Terus teka maning ustad Yonastan karo anake lanang, sing asline sekang Tangeran, Sruweng. Wis meh setengah 5 carike karo rombongane tetap durung teka-teka, sidane luraeh nekat mbukak acarane dhewek, sing intine nyritakena perjalanan milis karanganyar Kebumen lan perkembangane nganti siki. Bar luraeh mbukak acara diterusna sambutan sekang wakile shohibul bayt Bapak Ustad Rozikin. Wektu terus mlaku, ora kena diendheg. Kira-kira jam lima sore tempat acarane dipindah nang daleme Pak Nur sing nang Taman Kebayoran, jalaran lantai loro kuwe arep ana sing nganggo acara ulang tahun. Bareng meng njaba nang kana ana sing wis nunggu yakuwe kang Slamet karo kang Sukadi. Terus padha bareng-bareng meluncur meng omaeh Pak Nur sing jarak-ke kurang lewieh sekilo. Nang omaeh Pak Nur wis akeh bocah-bocah yatim piatu sing arep disantuni wis padha ngumpul. Kira-kira jam setengah 6 rombongane carik Haris, kang Sahri, Mbak Rima nembe teka. Terus ana maning Kang Bagus Sidamukti sekang Balikpapan sing pas ana nang Pandok Kopi, dadi bisa melu nggabung kopdar buka puasa. Ana uga Pak Sawadi sing nembe njemput anake nang Bogor ya melu acara kopdar. Ana uga kang Ali Makhfud karo adine. Acara jelang buka puasa bersama dibuka nang Pak ustad Yonastan, diterusna tausiyah nang ustad asal Wonogiri. Bar tausiyah terus mbatalna puasa bareng karo es buah, seger banget rasane, aku nganti entong rong gelas koh. Tajilane ana gorengan tahu tempe, anu aku senenge tahu ya sing tek jukut ya tahune bae. Mbatalna puasa secukupe terus padha sholat maghrib berjamaah nang mesjid perumahan Graha Taman Kebayoran. Aku dadi kelingan sekitar taun 2000-2003 aku sering mlayu-mlayu nang dalan ngarep omaeh Pak Nur. Nek dilurusna meng ngetan kayane umahku nang Bumi Sani Permai ya segaris adep-adepan karo omaeh Pak Nur. Ning siji sing ora bisa dirubah nek nang omaeh Pak Nur rasane madep ngalor ning sing bener madep ngetan, nek nang omahku dhewek rasane madep ngidul ning sebenere madhep ngulon. Dadine nek sholat aku rasane madhep ngidul terus. Bar sholat acara diterusna maning, ana sing dopokan maning, ana uga sing dadi ahli hisab alias ngudud. Ning sing jelas ora ana sing ngudude nganggo klembak menyan. Ora let suwe terus padha mangan prasmanan, gantian sewise bocah-bocah yatim piatu rampungan acara buka puasane. Panganane janjane enak-enak, ning wong anu wis kakehan ngombe aqua gelas karo es buah, dadi mangane ya mung sethithik. Bar mangan-mangan, terus padha kumpul maning nerusna acara kopdar. Acara terus diisi nang Pak Bambang Ris (Surisno) humas Iwakk Walet Emas, sing intine nyritakena kiprah paguyuban Iwakk Walet Emas nggo memajukan Kebumen. Misale mbantu bocah-bocah pinter sekang Kebumen sing ora mampu secara ekonomi ben bisa padha kuliah nang UI. Terus nyritakena tokoh-tokoh penting sekang Kebumen, kaya Martha Tilaar, Bimantoro, lan liya liyane. Pak Bambang Ris uga ngewei informasi nek tanggal 9 Nopember 2008 arep ana halal bihalal Iwakk Walet Emas nang GOR Bekasi, dadi kiye ana kesempatan nggo padha ngumpul kopdar maning. Saben taun Iwakk Walet Emas nganakena acara halal bihalal bar badan sing biasane tempate bergilir nang Jabodetabek. Aku dhewek durung tau nekani acara kuwe, tapi sing jelas miturut kang Maino mesti rame mergane sing teka bisa nganti limang ewuan wong. Angger wong limang ewu padha ndhopok dhewek-dhewek nganggo basa ngapak ya kaya tawon ondoan bubar mbok. Iwakk Walet Emas kuwe singkatane Ikatan Warga Asal Kabupaten Kebumen, WAni uLET, Eling Marang ASale. Slogane: Sindhen Rokoke Sintren, Wong Kebumen Ora Baen-Baen. Terus terang aku melu bangga dadi wong Kebumen. Pengalamanku dhewek wektu manggon nang kampung Rambutan, ternyata tangga-tanggane akeh wong Kebumen. Bareng aku pindah manggon nang Dukuh Zamrud Kota Legenda Bekasi, ternyata ya tangga-tanggane akeh wong Kebumen. Nang tempat kerjaku Indosat, ternyata ya akeh wong Kebumen. Ujarku nang ngendi-ngendi koh ana bae ya wong Kebumen. Balik meng Iwakk Walet Emas, sebenere organisasine wis gedhe, tur akeh anggotane, sayange durung ana sing memprakarsai nggawe website sing representative, ben bis diintip nang internet. Sawise cramah pak Bambang Ris rampung terus dianakna pundi amal milis karanganyar Kebumen, ning mbuh hasile pira aku ora patia nyimak.

Wektu wis tambah mbengi, ora krasa wis jam 9 kurang seprapat. Acara ditutup terus padha salam-salaman. Balike ana sing rombongan, ana sing dhewekan nganggo motor. Aku dhewek tekan ngomah jam 9 seprapat. Bareng chatting karo kang Maino jere tekan ngomah jam 11-an, nek carike tekan ngomah malah jam setengah rolas. Matur nuwun nggo Pak Nur sing wis kersa dadi tuan rumah kopdar sekaligus buka puasa bersama, muga-muga wektu liyane bisa ana kopdar maning. Nek ana kurang lewieh tulisan kiye, njaluk dingapura sedulur kabeh. Kesuwun.


Reported by:

Suwarto Kartadiraja
ramane_hatta@yahoo.com

(NggoeLing) : Uthi-Uthi lan sejenise

Nggo PengeLingan:

Uthi-Uthi
Karo lonthe Kewan sejenis, bedane gedhe karo cilik. Uripe nang lemah sing akeh sukete.

Bambung
Uripe nang wit krambil sing esih enom, nek wit krambil wis kena bambung biasane terus matine.

Umbuk-Umbuk
Kerjane nyurung-nyurung kotoran diunthuk-unthuk nganti dhuwur.

Kumbang
Manggone bisa nang wiwitan utawane nang njero pring garing, utawane nggerongi saka umah.

Jajal ditambaih maning nek sing tesih kelingan.

Salam
Suwarto Kartadiraja

NGGOLET MANUK

Salam paseduluran,

Jenenge perantau wis puluhan taun, suwe-suwe tek rasakena akeh istilah-istilah basa jawa sing wis mulai kelalen. Dadine nyong mulai mbiasakena ngomong basa ngapak maning ben ora kelalen lan kelingan maning. Lagi seneng ngeling-ngeling kedadiyan jaman gemiyen, nyong arep crita pengalaman nggolet manuk.

Jaman cilikane nyong, ndesaku tesih akeh wit-witan. Nek akeh wit-witan otomatis manuk uga akeh. Ning sing paling akeh terutama, manuk peking utawa emprit. Manuk peking sing nyong tesih kelingan ana telu jenise. Peking Biasa, Peking Bondol, karo Peking Kaji. Ning sing jenenge peking bondol karo kaji siki wis langka banget, sing tesih akeh ya peking biasa. Biasane manuk peking angger nyusuh(nggawe omah) nang wit sing mandan dhuwur tur nggrumbul. Angger arep ngakali manuk peking mbiyen nyong gawe perangkap sekan debog gedang garing utawa tali rafia sing dianyam. Lha mengko nek perangkape wis dadi terus dilebokna nang njero susueh manuk, karo dijiretna meng pang sing mandan kuwat. Lha nek manuke mlebu mesti terperangkap nang njero susuh. Ning kudu sering niliki, nek suwe ora ditiliki, bareng ditiliki manuke wis mati.

Seliyane peking kaji sing jaman bocahanku populasine lumayan akeh ya manuk manyar. Manuk manyar panganane gabah. Ning nggone nyusuh nang wit pucang (palem). Lha mbiyen aring kecamatan Karanganyar ngarep STM Bina Karya akeh banget wit pucang. Nang ndhuwur gemrandul susuh manuk manyar. Angger nggolet manuk manyar ya mlintheng nang kana. Kerep gara-gara salah posisi nggole mlintheng watune ora ngenani manuk manyar, ning malah nibani gendheng kantor kecamatan. Dadine diburu-buru nang pegawe kecamatan. Bola-bali diomeih karo diuber-uber, ning ya ora kapok-kapok luh... Angger ora ulih manuk, nang dalan balike biasane karo mlinthengi pakel-le wong, dasare bocah ndesa mandan nggragas tur nggrathil.

Kejaba peking karo manyar, manuk kampret karo kalong uga akeh. Kampret biasane kethanthilan nang wit krambil. Tapi uga ana sing manggone nang njero pupus wit gedang. Nek ora salah jenise ana telu, kampret buah sing panganene buah (sebangsa codhot) awake mandan coklat lodob, kampret lemut, sing panganene lemut, bentuke cilik tur lewih ireng, karo siji maning sing jenenge kalong sing pawakane paling gedhe. Nek kalong lewih seneng manggon nang alas, utawane gunung sing akeh wit-witane.

Lha angger nang sawah ana manuk sing jenenge blekok. Kelinganku jenise ya blekok putih karo blekok lodong sing wulune coklat. Ana jenis liyane sing nek nang desaku jenenge pitik-pitik-an, rupane ireng, ndhuwur cucuk mandan abang ning werit banget. Ana maning sing jenenge kurwok. Siji maning nyong kelingan sing jenenge gemek, angger umpetan ndhepepes nang lemah, ning bareng edhek meh kepidek nembe mabur......pleper.

Lha angger manuk piaraan kaya kethilang padane wis duwe siji, arep ngakali kethilang liyane sing mampir meng kandhang, ya mung gari dikalari sikile, dibukak lawange. Biasane kethilang sing nang njaba melu mlebu meng kandhang, gari ditutup lawange.

Kejaba mlintheng karo nungkrup, nggolet manuk uga bisa nganggo cara ngobor nek mbengi. Dadi nek mbengi manuk kan padha ngaso. Nek nang sawah biasane ngasone menclok nang wit budin. Angger mbengi manuk disenteri matane karo batere kan ora bisa bisa ndeleng. Dadi mung gari nyekel manuke.

Ning ana siji maning cara nggo ngakali manuk terutama manuk dara. Angger ana dara mabur terus diklepeki karo dara wadonan. Nek ora ana dara wadon, ya karo celana utawa gombal diumbul-umbulna. Biasane darane nek weruh terus muter-muter, ora let suwe terus mudhun. Lha nek wis mudhun mung gari main teknik nggole ngakali, arep diempani terus ditungkrup utawane diplintheng bae. Ning kiye mandan mbebayani. Wong gawene sing nduwe terus nggoleti nek ketemu terus dilakoni nganti gelut ben darane mbalik.

Wis dhisit ya sedulur nggone nguna jaman mbiyen. Jajal mbok sedulur duwe crita sing meh padha utawane lewih menarik dishare karo warga milist karanganyar. Anu nyong wong ndesa sih, dadine critane ya ndesa banget.....


Matur nuwun sedulurs,
Ramane Hatta (Suwarto Kartadiraja)

GUNUNG

Salam paseduluran,

Lagi kepengin ngeling-ngeling jaman gemiyen, nalikane tesih bocah, ujug-ujug kelingan tema gunung. Nek wingi enyong nulis tema kali, siki arep njajal nulis tema gunung. Nang desane enyong Karangkemiri definisi gunung kuwe daerah sing sa-ndhuwure kali Proyek (aliran/saluran kali dari sumber Waduk Sempor/Proyek Serbaguna Kedu Selatan untuk irigasi persawahan).

Ramaku asale wong gunung alias lor kali proyek, biyungku wong kidul kali proyek. Mergane mbahku wong gunung ya akhire gelem ora gelem dadi kerep munggah mudhun gunung. Angger munggah gunung rasane kesel banget, awake byuk-byukan kringetan nganti bajir, sikile rasane nganti thiyel kaya anu arep mrotholi. Gole mlaku rasane wis suwe banget, ning nyatane ora tekan-tekan nang tujuane. Ning sewalike nek mudhun gunung, rasane kaya ana sing njorogna sekang mburi, dadi mlakune lewih cepet, sedhela bae wis tekan tujuane.

Jaman cilikane enyong, gunung sing paling kerep diunggahi (didaki) ya kae Gunung Cemara. Fotone Mas Anung sing di-shoot sekang kulon sekolahan Panjatan, madhep ngalor back ground-ne Gunung Cemara. Enyong kerep munggah gunung Cemara, jalarane kancaku dolan sedulure akeh sing nang Kaliurang (sangisore Cemara). Dadi nek lagi dolan menyang sadulure kancaku ya sekaliyan munggah meng puncrit Cemara. Nek pas munggah gunung Cemara nang ndhalan kencoten, biasane ya ora kurang akal, mbedhul budin dipangan mentah ya rasane enak nggo ngganjel weteng. Nek wis tekan pucak biasane padha opor-opor(mbakar) budhin utawane kimpul. Nang puncak cemara uga ana wit buah-buahan kaya dhuwet, sawo kecik karo pakel. Jenenge bocah kencoten apa bae ya dipangan, nggragas lah pokoke. Nang gunung Cemara kuwe uga ana siji sendang (danau) sing jenenge Curug. Dadi seliyane munggah gunung biasane karo sekaliyan adus(renang) nang Sendang Curug. Sendang Curug kuwe ana grojogane gedhe. Miturut critane sendang Curug ora tau sat, ana banyune terus. Miturut crita mistis penduduk sekitare, sendang curug jarene nyambung nganti sekang Karangbolong. Ana penunggune sidhat raksasa. Kadang ana sing kecelakaan, ketilem nang sendang Curug. Nek wis kaya kuwe biasane digathuk-gathukna karo crita mistis mau. Mulane enyong mandan wedi angger lagi renang, nek kelingan crita mistis kuwe. Sekitare sendang uga akeh wit dhuren. Sing paling ditunggu nek lagi mangsa duren, biasane ana duren mateng sing tiba sekang wite. Rejeki temenen kuwe ketiban duren runtuh. Angger wis kadhemen nganti nggigil biasane nembe padha mentas. Pemandhangan sing apik nang sekitare gunung cemara ya kolam-kolam iwak sing diingoni iwak mas karo mujair. Banyune bening banget, seger, kadang nek wis ngelak banget, nekat ngumbe banyu belik sing bening. Nang Gunung Cemara ana cekdam (bendungan), nggo nampung banyu nggo keperluan warga sekitar gunung. Saiki mbuh kaya apa kahanane wong wis 15-an taun lewih ora tau munggah gunung cemara maning.

Seliyane gunung Cemara enyong uga wis tau munggah meng gunung Condong. Critane wektu enyong kelas 4 SD remaja2 nang desaku padha ngrencana meng Gunung Condong pas bulan Puasa. Enyong
ngrayu kakangku ben ulih melu. Akhire enyong ulih melu. Jalur dalan sing diliwati, Karangkemiri ngetan, Palarangan, Candi ngalor, mbuh Karang Jambu apa Sidagung, ngalor maning tekan Giripurna. Sing enyong esih kelingan, sawise Giripurna ana hutan pinus, sawise pinusan ana dalan setapak sing mandan mringgani nek diliwati. Sateruse enyong wis kelalen jalure. Untunge cuaca wektu semana lagi mandan mendhung dadi puasane ya Alhamdulillah padha ora medhot. Sawise marem nang puncak Condong, terus mudhun gunung, balike liwat Karanggayam. Tekan Karanggayam ana sing balike mlaku ana sing nganggo colt Karanggayam-Karanganyar. Jaman siki jere Candi ngalor dalane wis apik bareng dibangun nang pak Suman, tapi ya mbuh enyong dhewek wis suwe banget ora tau ngambah dalan kuwe.

Crita masalah gunung enyong uga dadi kelingan jeneng-jeneng gunung nang sekitare Karanganyar.
1. Gunung Cemara, nang ndhuwure desa Wanareja, gunung favorit-e enyong.
2. Gunung Condong, nang daerah Karanggayam ngalor - ngetan, mbuh mlebune wilayah ngendi
3. Gunung Grenggeng, nang lor Kemit
4. Gunung Buthak, paling jelas nek disawang sekang desaku.
5. Gunung Tumpeng, bentuke persis tumpeng (kerucut) nang Karanggayam kidul nek ora salah
6. Gunung Sewu, ana sing nyebut gunung gamping, posisine nang daerah Gombong ngidul.
7. Gunung Mahameru, daerah Rowokele ngalor.
8. Gunung Sindoro - Sumbing, nek ora salah sekan Sruweng lan wetane nek ndeleng ngalor ngetan cuaca lagi apik biasane keton.
9. Gunung Slamet nang Purwokerto, bisa keton jelas nek cuaca lagi cerah.

Anu lagi bocah mandan kerep munggah gunung, bareng nduwe bojo ternyata ulih wong pereng gunung, tepate pereng Gunung Lawu, Ngawi Jawa Timur. Angger lagi bali nang nggone bojoku pas mangsa ketiga, biasane gunung Lawu abang kaya ana genine. Jarene penduduk setempat nek lagi musim ketiga ana bae kebakaran nang sekitare puncak Lawu.

Wis dhisit critane ya sedulur. Moga-moga dadi ana sing padha kelingan jaman kuna. Siki enyong lagi mandan seneng nguna. Ning enyong njaluk ngapura karo founder, pengurus milis karo kabeh warga milis Karanganyar Kebumen, nek tulisan kaya kiye ora ana gunane utawa malah mung ngebek-ngebeki milis thok.

Matur nuwun sedulur kabeh,
Ramane Hatta (Suwarto Kartadiraja)

KALI

Salam paseduluran,

Jalaran omah wong tuaku nang pereng kali, lor pasar Karanganyar, inyong dadi pengin crita masalah kali. Jaman cilikanku wektu tesih SD saben dina sabane nang kali. Tujuane werna-werna sing arep dus-dusan, mancing, nggolet iwak, nggolet watu utawane mbuang hajat. Ning jenenge bocah cilik senenge ya dus-dusan nganti matane abang. Nek durung diparani wong tuwane, dipenthelengi utawane digebuki ya ora mentas-mentas. Malah kadang ora kelingan wektu karo cuaca, sementara langit ndhuwur Karanggayam wis ireng ya tesih pada nekat dus-dusan nang kali. Nganti tau salah siji kancaku kegawa banjir gara-gara ora sadar nek aring gunung udane gede dadi banjire cepet banget.

Senenge dadi wong sing urip nang pinggir kali ya nek mangsa ketiga, kali biasane sat, nggolet iwak gampang. Carane ya bisa mancing, rogoh, tawu, nyamber utawane nyetrum. Tapi saya suwe wong-wong ndesa pada mblubut. Kali dipotas utawane diendrin dadi iwake pada mabok kabeh. Ning jenenge wong ndesa ora ana kesadaran masalah lingkungan, angger kaline cethek pada urunan tuku potas utawa endrin. Nek kaline lagi sat wong daerahku ya pada seneng wong nek arep pasar dadi gampang, kari nyabrang kali wis tekan jalan Kartini, ngidul lewat SMP Masehi gutul pasar. Kaya inyong dhewek ya dadi kepenak nek mangkat sekolah meng SMP 1 Karanganyar. Lha wong tembok mburi SMP 1 keton nek dideleng kan jendela omahku.
Susaeh dadi wong pinggir kali ya nek mangsa udan kerep banget banjir, senajan banjire mung sedhela ning ya tetep bae rasane nlangsa. Banjire jalaran kaline luber utawane sing paling sering ya tanggule bedah utawa dedel, lha wong tanggul kali sing nang desaku paling kandele mung semeter, sementara tanggul Karanganyar 15-an meter isine papringan thok. Dadi saben taun ya nglokro kena banjir terus. Ning jaman awal 90-an, alhamdulillah kali dibronjong dadi ora tau banjir maning, anggera banjir paling ya banyu mlewed.

Crita-crita masalah kali, inyong dadi kelingan jeneng-jeneng kali nang daerah sekitar Karanganyar.
1. Kali Karanganyar, kali kidul omahku sing penuh kenangan jaman cilikanku.
2. Kali Banda, kali sing apik nggo nyamber jalaran akeh iwake.
3. Kali Jebug, kali sing akeh watune, nek arep mbangun omah nggolet watune nang kana.
4. Kali Abang, kali sing nggo pertumpahan darah jaman perang kemerdekaan.
5. Kali Kethek, kali sing nggo mbuang korban petrus jaman taun 80-an.
6. Kali Bangkong, kali antarane Karangkemiri karo Plarangan.
7. Kali Jomblang, kali nggo nggolet suket jamane inyong tesih ngarit.
8. Kali Tengah, kali nggo ngapa ya....?
9. Kali apa maning ya.....?

Wis semene dhisit critane ya sedulur kabeh. Insya Allah ngesuk disambung crita nguna sing liyane. Jajal sedulur apa padha dhuwe kenangan masalah kali?

Matur nuwun sedulurs,
Ramane Hatta (Suwarto Kartadiraja)